រាជធានីភ្នំពេញ ៖ មន្ទីរពេទ្យរ៉ូយ៉ាល់ភ្នំពេញបានរៀបចំសិក្ខាសាលាមួយដល់និស្សិតពេទ្យ និងអ្នកជំងឺដែលប្រឈមនឹងស្ទះ និងដាច់សរសៃឈាមខួរក្បាលដោយមានការចូលរួមបង្ហាញពីវេជ្ជបណ្ឌិតជំនាញមកទីក្រុងបាងកក និងវេជ្ជបណ្ឌិតប្រចាំមន្ទីរពេទ្យរ៉ូយ៉ាល់ភ្នំពេញផ្ទាល់តែម្ដង ។ សិក្ខាសាលានេះបានធ្វើឡើង កាលពីព្រឹកថ្ងៃទី១៥ ខែធ្នូ ឆ្នាំ២០១៨ នៅមន្ទីរពេទ្យរ៉ូយ៉ាល់ភ្នំពេញផ្ទាល់តែម្ដង ។
លោកស្រីវេជ្ជបណ្ឌិត ហុក តុលា ឯកទេសប្រព័ន្ធប្រសាទប្រចាំមន្ទីរពេទ្យរ៉ូយ៉ាល់ភ្នំពេញបានមានប្រសាសន៍ថា ជំងឺស្ទះ និងដាច់សរសៃឈាមខួរក្បាលជាជំងឺគ្រោះថ្នាក់ខ្លាំង និងត្រូវការសង្គ្រោះបន្ទាន់ដែលវាមានរយៈពេលខ្លីបំផុតសម្រាប់សង្គ្រោះអ្នកជំងឺ ហើយបើសិនជាជួយសង្គ្រោះមិនទាន់ទេអ្នកជំងឺនឹងមានគ្រោះថ្នាក់ដល់អាយុជីវិត ។ លោកស្រីថា «បើសិនជាអ្នកជំងឺមានរោគសញ្ញាស្ទះសរសៃឈាមខួរក្បាលភ្លាម គឺត្រូវទាក់ទងជាបន្ទាន់ទៅកាន់មន្ទីរពេទ្យ ឬបញ្ជូនអ្នកជំងឺទៅមន្ទីរពេទ្យ ហើយមានរយៈពេលតែ៤ម៉ោងកន្លះប៉ុណ្ណោះ ដើម្បីជួយអ្នកជំងឺដោយប្រើថ្នាំរំលាយកំនកឈាម» ។
លោកស្រីបន្តថា រោគសញ្ញានៃជំងឺស្ទះ និងដាច់សរសៃឈាមខួរក្បាលមានបីធំៗដែលគួរយល់ដឹងដូចជាអ្នកជំងឺវៀចមាត់ ធ្លាក់មុខមួយចំហៀង ទន់ដៃកាន់អ្វីលែងជាប់ និងការនិយាយស្តីប្លែកៗ និយាយមិនច្បាស់ជាដើម ។ កត្តាដែលកើតជំងឺស្ទះសរសៃឈាមខួរក្បាលបណ្ដាលមកពីលើសឈាម ទឹកនោមផ្អែម លើសខ្លាញ់ ធាត់ពេក ពិសាបារីជាដើម ហើយដើម្បីបញ្ឈប់ឬក៏ការពារជំងឺនេះបានមនុស្សទូទៅគួរតែព្យាយាមហាត់ប្រាណអោយបានទៀងទាត់ គ្រប់គ្រងរបបអាហារប្រចាំថ្ងៃអោយបានល្អ និងរក្សាទម្ងន់អោយបាន
ល្អជាដើម ។
លោកវេជ្ជបណ្ឌិត អាសាវីន ចមជីត អ្នកជំនាញឯកទេសប្រព័ន្ធប្រសាទមកពីប្រទេសថៃក៏បានអោយដឹងដែរថា ដើម្បីការពារជំងឺស្ទះ និងដាច់សរសៃឈាមខួរក្បាលអ្នកជំងឺ ឬមនុស្សទូទៅគួរហាត់ប្រាណអោយបានទៀតទាត់យ៉ាងហោចណាស់៤ដងក្នុងមួយសប្ដាហ៍ និង២០ ឬ៣០នាទីក្នុងមួយថ្ងៃ ។ ម្យ៉ាងទៀតការបរិភោគអាហារដែលត្រឹមត្រូវក៏ជាកត្តាការពារ និងទប់ស្កាត់ជំងឺស្ទះ និងដាច់សរសៃឈាមខួរក្បាល បានមួយចំណែកដែរ ។
លោកបន្តថា ការពិនិត្យសុខភាពជាទៀតទាត់ក៏ជាកត្តាសំខាន់ណាស់ ដើម្បីការពារជំងឺស្ទះ និងដាច់សរសៃឈាមខួរក្បាល និងជំងឺផ្សេងៗទៀត ហើយការពិនិត្យសុខភាពនេះដែរបើសិនជារកឃើញមានជំងឺអ្វីនោះ យើងអាចព្យាបាលបានទាន់ពេលវេលា និងមិនត្រូវទុកអោយជំងឺនោះកាន់តែរាលដាលឡើយ ។ លោកថាមន្ទីរពេទ្យរ៉ូយ៉ាល់ភ្នំពេញក៏មានឯកទេសខាងទប់ស្កាត់ជំងឺស្ទះ និងដាច់សរសៃឈាមខួរក្បាលនេះដែរ ដូចនេះអ្នកជំងឺ និងមនុស្សទូទៅគួរតែជ្រើសរើសមន្ទីរពេទ្យណាដែលមានឯកទេសត្រឹមត្រូវសម្រាប់ព្យាបាលជំងឺ ។
ចំណែកលោកវេជ្ជបណ្ឌិត សារ៉ុន ចូទីកាសធីរ៉ា ឯកទេសវះកាត់ប្រព័ន្ធប្រសាទបានអោយដឹងថា ជំងឺនេះអាចកើតទៅលើមនុស្សគ្រប់វ័យមិនមែនតែមនុស្សចាស់នោះទេ ហើយបញ្ហាសំខាន់សម្រាប់ព្យាបាលជំងឺនេះ គឺពេលវេលា បើសិនជាបញ្ជូនអ្នកជំងឺមកកាន់មន្ទីរពេទ្យមិនទាន់ពេលវេលានោះទេ ក្រុមគ្រូពេទ្យពិតជាមិនអាចជួយសង្គ្រោះបានឡើយ ព្រោះក្រុមគ្រូពេទ្យមិនមែនជាព្រះនោះទេ គឺត្រូវការពេលវេលា និងការងារជាក្រុម ដើម្បីព្យាបាលអោយមានប្រសិទ្ធភាព ៕
The post មន្ទីរពេទ្យរ៉ូយ៉ាល់ភ្នំពេញបង្ហាញពីហានិភ័យ និងមូលហេតុនៃជំងឺស្ទះ និងដាច់សរសៃឈាមខួរក្បាល appeared first on Koh Santepheap Daily.