រាជធានីភ្នំពេញ ៖ សាលាអន្តរជាតិហ្សាម៉ាន់សហការជាមួយកម្មវិធីសប្បុធម៌កម្ពុជាបានប្រមូលថវិកាចំនួន $៦៤២០ កាលពីពេលថ្មីៗនេះ ដើម្បីជួយដល់មន្ទីរពេទ្យគន្ធបុប្ផា II និងបានផ្តល់ជូនដល់មន្ទីរពេទ្យកាលពីថ្ងៃអង្គារ៍ ទី១០ ខែមេសា ឆ្នាំ២០១៨ ។
កម្មវិធីសប្បុរធម៌នេះបានប្រមូលថវិកាដ៏មានអត្ថន័យដើម្បីជួយដល់កម្ពុជា ដែលជាគោលបំណងចម្បងរបស់សាលាអន្តរជាតិហ្សាម៉ាន់ អស់រយៈពេលជាច្រើនឆ្នាំមកហើយ ក្រោមការចូលរួមដោយសហគមន៍នៅក្នុងតំបន់ដែលនេះជាចំណុចសំខាន់របស់សាលា។ ជាថ្មីម្ដងទៀត ការងារសប្បុរសធម៌ដ៏សក្តិសមនេះកើតចេញពីកិច្ចខិតខំប្រឹងប្រែងរបស់សិស្សានុសិស្ស និងលោកគ្រូអ្នកគ្រូ និងផ្ដល់ជាប្រយោជន៍ដល់មន្ទីរពេទ្យគន្ធបុប្ផា II សាលាបានសម្រេចស្នើព្រះករុណា ព្រះបាទសម្ដេច ព្រះបរមនាថ នរោត្ដម-សីហមុនី លើព្រះទ័យសម្រេចពាក់ព័ន្ធនឹងការបរិច្ចាគថវិកាចំនួន$៦៤២០ ដែលបានមកពីការរៃអង្គាសនៅក្នុងកម្មវិធីសប្បុរសធម៌កាលពីឆ្នាំទៅ។ ដោយហេតុថា ព្រះករុណា ជាប់មមាញឹក ដូច្នេះ Zaman Student Union (ZSU ) ទើបតែទទួលបានការឆ្លើយតបពី ព្រះករុណា នាពេលថ្មីៗនេះ។
ZSU សម្រេចជួយដល់មន្ទីរពេទ្យគន្ធបុប្ផា ព្រោះមន្ទីរពេទ្យនេះជួយសង្គ្រោះកុមារទូទាំងប្រទេសកម្ពុជាដោយឥតគិតថ្លៃ បើទោះជាគាត់ជាខ្មែរ ឬជនបរទេសក្ដី ហើយការងារសង្គ្រោះអាយុជីវិតមានជារៀងរាល់ថ្ងៃ។ ក្រុមការងារ ZSU ជឿជាក់ថា ព្រះករុណា នឹងយល់ស្របតាមការសម្រេចដូចនេះ ដោយមន្ទីរពេទ្យមួយនេះត្រូវបានកសាងឡើងដោយមានការរួមចំណែកពី ព្រះករុណា ព្រះបាទសម្ដេចព្រះ នរោត្តម សីហនុ។
មន្ទីរពេទ្យនេះជាសាខាទីពីរនៃមន្ទីរពេទ្យគន្ធបុប្ផា I ដែលត្រូវបានកសាងឡើងវិញនៅក្នុងឆ្នាំ១៩៩២ ដោយរដ្ឋាភិបាលកម្ពុជា ក្រោមការចូលរួមរបស់វេជ្ជបណ្ឌិតជនជាតិស្វីសម្នាក់ឈ្មោះ Beat Richner ។
លោកវេជ្ជបណ្ឌិត Beat Richner បានបន្តគ្រប់គ្រងការងារទូទៅនៅមន្ទីរពេទ្យនេះរហូតដល់សព្វថ្ងៃ និងបន្តពង្រីកទីកន្លែង ព្រមទាំងនៅរក្សាបាននូវស្ដង់ដាខ្ពស់។ នៅក្នុងរយៈពេលជាង២៦ឆ្នាំមកនេះ មន្ទីរពេទ្យគន្ធបុប្ផាបានជួយកុមារប្រមាណ១៣លាននាក់នៅក្រៅមន្ទីរពេទ្យ និង ១៥៦លាននាក់ដែលមានជំងឺធ្ងន់ធ្ងរ ហើយត្រូវនៅសម្រាកព្យាបាល៕
The post កម្មវិធីសប្បុធម៌របស់សាលាអន្តរជាតិហ្សាម៉ាន់បរិច្ចាគថរិកាជូនមន្ទីរពេទ្យជួយកុមារ appeared first on Koh Santepheap Daily.