រាជធានីភ្នំពេញ ៖ ទោះជាអាជីពជាអ្នកម៉ាស្សាហាក់មិនសូវមានតម្លៃក្នុងក្រសែភ្នែកប្រជាជនកម្ពុជាមួយចំនួនក្ដី ប៉ុន្តែវាអាចផ្តល់ចំណូលប្រចាំខែច្រើនគួរសមដល់នារីម៉ាស្សាម្នាក់ មិនចាញ់ការងារនៅក្នុងស្ថាប័នផ្សេងទៀតឡើយ។ សម្រាប់នារីម៉ាស្សាម្នាក់ដែលប្រកបអាជីពនេះអស់រយៈពេល១០ឆ្នាំនៅហាងចំប៉ីស្ប៉ា បានឱ្យដឹងថា បន្ទាប់ពីនាងចាប់អាជីពជានារីម៉ាស្សានៅហាងមួយនេះ ក្រៅពីធ្វើឱ្យកញ្ញាមានជីវភាពសមរម្យជាងមុន វាក៏ផ្តល់ចំណេះ និងជំនាញជាច្រើនសម្រាប់កញ្ញាផងដែរ។
ស្ថិតក្នុងសម្លៀកបំពាក់អាវដៃខ្លីពណ៌បៃតងខ្ចី ខោជើងវែង ដែលជាសម្លៀកបំពាក់ប្រចាំហាងចំប៉ីស្ប៉ា កញ្ញាទូច ស្រីណា ហៅស្រីខួច បានចាប់ផ្តើមធ្វើការជាអ្នកម៉ាស្សានេះតាំងពីអាយុ១៧ឆ្នាំ។
និយាយបណ្តើរអមដោយស្នាមញញឹមបណ្តើរ នារីម៉ាស្សាសម្បុរស្រអែម បច្ចុប្បន្នមានវ័យ២៧ឆ្នាំ បានរៀបរាប់ថា កាលពីដំបូងកញ្ញា មិនបានចាប់អារម្មណ៍ និងអាជីពជាអ្នកម៉ាស្សានេះទេ ដោយសារតែអាជីពនេះ ត្រូវបានប្រជាពលរដ្ឋខ្មែរ រួមទាំងកញ្ញាផងនោះ យល់ថា មិនល្អ និងគិតថា ជា «របរផ្លូវរកស៊ីផ្លូវភេទ» ប៉ុន្តែក្រោយពីបងប្អូននាងបានណែនាំឱ្យមកធ្វើការនៅហាងចំប៉ីស្ប៉ានេះ ធ្វើឱ្យជីវិតកញ្ញាប្រែប្រួលយ៉ាងខ្លាំង។ បច្ចុប្បន្ននេះកញ្ញាបានក្លាយជាគ្រូបង្គោល បណ្តុះបណ្តាលបុគ្គលិកប្រចាំហាងចំប៉ីស្ប៉ា បន្ទាប់ពីធ្វើបាន៦ឆ្នាំ ខណៈដែលកាលពីមុននាងត្រឹមតែជាក្មេងស្រីរៀនបានត្រឹមថ្នាក់ទី៦ប៉ុណ្ណោះ ហើយថែមទាំងមិនចេះអក្សរទៀត។
ក្នុងទឹកមុខស្រស់ស្រាយរាក់ទាក់ ស្រីខួច បាននិយាយថា បន្ទាប់ពីចូលធ្វើការនៅហាងចំប៉ីស្ប៉ា ម្ចាស់ហាងបានផ្តល់ឱកាសឱ្យនាងបានរៀនសូត្រ និងរៀនស្វែងយល់ពីសង្គម ដែលរហូតមកដល់បច្ចុប្បន្ននេះ កញ្ញាអាចចេះអាន និងសរសេរអក្សរបាន ហើយថែមទាំងយល់ដឹងពីបញ្ហាសង្គមបានច្រើនជាងមុន។
កញ្ញាទូច ស្រីណា គ្រូបង្គោលម៉ាស្សាប្រចាំហាងចំប៉ីស្ប៉ារូបនេះ រៀបរាប់បន្ថែមថា៖ «និយាយទៅអាជីពម៉ាស្សានេះ គឺផ្តល់អត្ថប្រយោជន៍ដល់ខ្ញុំច្រើននៅនេះ ។ ទី១.ផ្តល់ឱ្យខ្ញុំយល់ដឹងពីសង្គម ។ ទី២.ផ្តល់ចំណេះដឹងជាអក្សរឱ្យខ្ញុំចេះសរសេរ ចេះអាន ចេះស្តាប់ ហើយ ទី៣.ផ្តល់ចំណេះដឹងកាយវិការក្បាច់ម៉ាស្សា ហើយក្បាច់នេះបែបសុខភាព ដល់យើងយល់ដឹងច្រើន ហើយផ្តល់អត្ថប្រយោជន៍ឱ្យយើងបានច្រើន ហើយយើងក៏ផ្តល់ឱ្យអតិថិជនទៅវាមានប្រសិទ្ធភាព» ។
ហាងចំប៉ីស្ប៉ា ជាហាងមួយដែលរក្សានូវក្បាច់ម៉ាស្សាបែបបុរាណ ។ មិនត្រឹមតែក្បាច់ម៉ាស្សានោះទេ ការរចនាហាងនេះមានលក្ខណៈបុរាណដែរ ដោយលាយលំនឹងធម្មជាតិ ស័ក្តិសមជាកន្លែងសម្រាប់សំរាកកាយ សម្រួលអរម្មណ៍ហត់នឿយ និងការឈឺចុករោយ ក្រោយរងសម្ពាធពីការងារធ្ងន់ៗ។ ហាងចំប៉ីស្ប៉ា បានផ្តល់សេវាកម្ម ម៉ាស្សា ដើម្បីជួយសម្រួល និងដោះស្រាយរាល់បញ្ហាដែលកើតមានលើសុខភាពសារពាង្គកាយដូចជា ការឈឺចុកចាប់តាមរយៈសរសៃពួរសាច់ដុំ សន្លាក់ឆ្អឹង ភាពចុករោយស្ពឹកស្រពន់ ចលនាឈាម និងសម្ពាធខ្យល់ដំណើរការមិនល្អ ភាពតានតឹងក្នុងអារម្មណ៍…ល។ អ្វីកាន់តែពិសេសនោះ គឺរក្សាទំនៀមទំលាប់ប្រពៃណីពីបុរាណតាមរយៈស្ទាយម៉ាស្សាខ្មែរបុរាណ។
រហូតមកទល់បច្ចុប្បន្នហាងចំបីស្ប៉ាមាន៥សាខានៅរាជធានីភ្នំពេញ។ សេវាកម្មរបស់ហាងនេះ ត្រូវបានចែកជាពីរផ្នែកធំៗគឺ៖ ទី1 សេវាកម្មម៉ាស្សាផ្នែកសុខភាពមាន៥សេវាកម្ម និងទី2 សេវាកម្មថែរក្សាសម្រស់មាន៤សេវាកម្ម។ ហាងមួយនេះ មិនមែនតែផ្តល់ចំណេះដឹងនោះទេ ថែមទាំងធ្វើឱ្យជីវភាពកញ្ញាស្រីខួចមានជីវភាពល្អជាងមុន ដែលអាចមានលទ្ធភាពជួយផ្គត់ផ្គង់គ្រួសារមិនឱ្យខ្លះខាតថែមទៀតផង។ ព្រោះនៅទីនេះ ក្រៅពីផ្តល់ប្រាក់ខែក៏មានផ្តល់ប្រាក់ម៉ោង និងប្រាក់ធីបពីភ្ញៀវទៀតផង។
ជាការពិតមនុស្សមួយចំនួនបានវាយតម្លៃថា អាជីពម៉ាស្សាជាអាជីពមួយមិនល្អ ស្រដៀងនឹងសេវាកម្មផ្លូវភេទ ដែលធ្វើឱ្យមនុស្សមួយចំនួនយល់ច្រលំ និងបានប្រើពាក្យសម្តីមាក់ងាយទៅកាន់នារីម៉ាស្សា។ សូម្បីតែកញ្ញាស្រីខូចផ្ទាល់ដែលធ្វើការនៅហាងចំប៉ីស្ប៉ា ជាហាងដែលផ្តល់តែសេវាកម្ម ម៉ាស្សា និងស្ប៉ា ដើម្បីឱ្យភ្ញៀវបានសម្រាកចិត្តកាយ ក៏ធ្វើធ្លាប់ជួបបញ្ហានេះដែរ។
ស្រី្តម៉ាស្សាដែលមានស្រុកកំណើតនៅកៀនស្វាយរូបនេះបានប្រាប់ថា ៖ «ខ្ញុំផ្ទាល់ ភ្ញៀវខ្លះគាត់យកលុយមកជះមកលើខ្ញុំអ៊ីចឹង ប៉ុន្តែអាស្រ័យលើខ្លួនឯងចេះឱ្យតម្លៃលើខ្លួនឯង យើងក៏និយាយប្រាប់ភ្ញៀវថា កន្លែងនេះមិនមែនជាកន្លែងប្រើសេវាកម្មផ្សេងទេបង ។ កន្លែងនេះ ជាកន្លែងផ្តល់សេវាកម្មសុខភាពធ្វើឱ្យបងបានកាត់បន្ថយភាពតានតឹង ភ្ញៀវខ្លះគាត់យល់ដឹង ភ្ញៀវខ្លះគាត់អត់យល់ដឹង ។ គាត់មក គាត់ចាប់គាត់អីអញ្ចឹង គាត់យកលុយមកជះលើបុគ្គលិក»។
បើទោះបីជាធ្លាប់ជួបរឿងរ៉ាវបែបនេះ ក៏ដោយ ប៉ុន្តែកញ្ញា មិនដែលគិតនឹងបោះបង់អាជីពមួយនេះឡើយ។ កញ្ញាបន្តថា នៅថ្ងៃមុខប្រសិនបើកញ្ញាមានលទ្ធភាព កញ្ញានឹងបើកហាងម៉ាស្សា និងស្ប៉ាតូចមួយ៕
The post នារីម៉ាស្សា ៖ ព្រោះតែអាជីពម៉ាស្សា ទើបធ្វើឱ្យខ្ញុំមានចំណេះ និងជំនាញដូចរាល់ថ្ងៃ! appeared first on Koh Santepheap Daily.